Qazaxıstan, Astana, 7 dekabr /Trend, müxbir A.Maratov/
Qazaxıstanın milli taxıl şirkəti "Prodkorporasiya" SC 2010-cu ilin sonunadək və 2011-ci il ərzində Qazaxıstan daxilində ərzaq tədarükünün təmini, un və çörəyin qiymətinin stabilləşməsi üzrə öhdəliklərin yerinə yetirilməsi səbəbindən Azərbaycana taxıl ixrac etməyi planlaşdırmır.
"Azərbaycanın 2011-ci il avqustun 1-dək taxıl və un idxalçılarını ƏDV-nin ödənilməsindən azad etməsinə baxmayaraq, "Prodkorporasiya" 2011-ci ildə qonşu Azərbaycana taxıl tədarük etməyi planlaşdırmır. Qazaxıstan daxilində ərzaq tədarükünün təmini, un və çörəyin qiymətinin stabilləşməsi üzrə öhdəliklərimiz var və bütün resurslarımız bu məqsədlərə yönəldiləcək", - Trend-ə SC-nin kommersiya departamentinin direktoru Kazbek Ömərov deyib.
O, xatırladıb ki, "Prodkorporasiya" Azərbaycana taxıl tədarükünü 2010-cu ilin avqustunda, əsas "sosial məhsul" adlandırılan çörək və unun qiymətinin stabilləşməsi barədə məsələ kəskin şəkildə meydana çıxan zaman dayandırıb.
İlin əvvəlindən avqustadək milli şirkət Azərbaycan bazarına orta hesabla 150 min ton buğda tədarük edib.
"Lakin, Azərbaycana taxıl tədarükünü hazırda Qazaxıstanın özəl şirkətləri həyata keçirir", - Ömərov qeyd edib.
Onun sözlərinə görə, bu gün "Prodkorporasiya" "KazAqro", "Taxıl ittifaqı" ilə imzalanmış memoranduma əsasən, Qazaxıstanın bütün regionlarına orta hesabla 220 min ton taxıl tədarük edir.
"Prodkorporasiya" memorandumu 2011-ci il oktyabrın 1-dək bağlayıb, buna görə şirkət gələn il də Azərbaycana taxıl tədarük etməyəcək. Lakin ölkəyə taxıl ixrac edəcək digər özəl şirkətlər paritet əsasda "Prodkorporasiya"ya məxsus olan Bakı Taxıl Terminalından istifadə edə bilərlər", - Ömərov vurğulayıb.
Onun fikrincə, bununla belə, Azərbaycanın taxıl və una ƏDV-ni ləğv etməsi özəl şirkətlər tərəfindən Qazaxıstan taxılının tədarük həcminə təsir göstərməlidir, eləcə də Azərbaycanın daxili bazarında çörək və unun qiymətinin azalmasına gətirib çıxara bilər.
"Qazaxıstan ildə 1 milyon tona yaxın buğda idxal edən Azərbaycana digər şirkətlərin timsalında taxıl tədarükünü davam etdirəcək. Bundan başqa, onu da nəzərə almaq lazımdır ki, Rusiya öz ərazisindən taxıl ixracına qoyulan qadağanın vaxtını uzadıb və Ukrayna da taxıl idxalına kvota tətbiq edib", - o, bildirib.
