Azərbaycan, Bakı, 22 dekabr /Trend, müxbir A.Axundov/
Birləşmiş Ərəb Əmirliklərinin (BƏƏ) Federal Gömrük İdarəsi və Azərbaycan Dövlət Gömrük Komitəsi (DGK) gömrük məsələlərində əməkdaşlıq və qarşılıqlı yardım haqqında saziş layihəsinin son variantı üzərində işə başlayıblar. Bu barədə BƏƏ-in WAM Dövlət İnformasiya Agentliyi məlumat verib.
Danışıqların birinci raundu dekabrın 19-21-də Əbu Dabidə keçirilib. Azərbaycan tərəfdən sazişin hazırlanmasında Gömrük Nəzarəti Baş İdarəsinin rəisi Şahin Bağırovun Azərbaycanın BƏƏ-dəki səfirliyi ilə koordinasiyada başçılıq etdiyi DGK-nın nümayəndə heyəti iştirak edib.
Saziş iki ölkə daxilində prosedurlar başa çatdıqdan sonra imzalanmaya hazır olacaq. Saziş gömrük hüquqpozmalarının sayının azaldılmasına, daha dəqiq hesablamaların aparılmasına, gömrük rüsumlarının yığılmasına və nəzarətin gücləndirilməsi məqsədi daşıyır.
