Türkmənistan, Aşqabad, 28 dekabr /Trend, müxbir H.Həsənov/
Türkmənistan Prezidenti Qurbanqulu Berdiməhəmmədov ölkənin müstəqilliyinin 20 illiyinin bayram edilməsinə qədər (2011-ci il 27 oktyabr) Türkmənistanı qonşu İran və Qazaxıstanla birləşdirəcək Şimal-Cənub dəmiryol magistralının tikintisinin başa çatdırılması barədə göstəriş verib. Bu barədə çərşənbə axşamı "Neytral Türkmənistan" qəzeti yazır.
"Bu, Avropa və Asiya ölkələri arasında beynəlxalq daşımaların həyata keçirilməsi üçün yeni imkanlar açır", - o, deyib.
Layihə 2007-ci ildə Türkmənistan, İran və Qazaxıstan arasında imzalanan saziş əsasında həyata keçirilir. 900 kilometrlik magistralın tikintisi Fars körfəzinə ən qısa çıxışı təmin edir. Yeni yolun ümumi uzunluğunun 700 kilometri Türkmənistan ərazisindən keçir. Kiçik yüksəklilərə və dərələrə malik relyefinə görə çox mürəkkəb olan bu ərazidə inşaatçılar qumluqları, şoranlıqları və düzənlikləri dəf etməli olacaqlar. Bütün yol boyu 20-dən artıq stansiya və keçid, onlarla mühəndis qurğuları tikiləcək.
Beynəlxalq dəmiryolunun çoxkilometrlik kəsiyi Uzen (Qazaxıstan) - Qızılqaya - Bərəkət - Ətrək (Türkmənistan) - Qorqan (İran) şəhərlərini əhatə edəcək, üç ölkəni Rusiya ilə birləşdirəcək və Fars körfəzinə çıxışı təmin edəcək. Bu marşrut üzrə istismarın ilk illərində hər il 5 milyon tonadək yük daşınacaq. Perspektivdə isə bu rəqəm ildə 10-12 milyon tonadək artırılmalıdır.