Azərbaycan, Bakı, 28 dekabr /Trend, müxbir N.İsmayılova/
Gələn ildən etibarən Azərbaycanda "bir pəncərə" sistemi vasitəsilə kommersiya hüquqi şəxslərin elektron qeydiyyatının tətbiqi üzrə təkliflərin hazırlanmasına başlanılacaq. Bu barədə çərşənbə axşamı Vergilər Nazirliyi Vergi Siyasəti və Starteji Araşdırmalar Baş İdarəsinin şöbə müdiri Vüsal Şıxəliyev deyib.
"Bu gün artıq fiziki şəxslər üçün elektron qeydiyyat sisteminin sınaqdan keçirilməsi başa çatmaq üzrədir. Onun yaxın vaxtlarda işə salınması gözlənilir", - Şıxəliyev qeyd edib.
Onun sözlərinə görə, ölkənin Vergilər Nazirliyi bu sahədəki beynəlxalq təcrübəni öyrənir. Ölkədə kommersiya şəxslərinin elektron qeydiyyatı tətbiq edildikdən sonra fərdi identifikasiya nömrəsinin alınması internet vasitəsilə müraciət etməklə mümkün olacaq.
"Bu, "bir pəncərə" sisteminin inkişafına və Azərbaycanın investisya imkanlarının yaxşılaşdırılmasına xidmət edəcək", - o bildirib.
Şıxəliyevin sözlərinə görə, nazirlik 2011-ci ildən etibarən internet vasitəsilə vergiödəyicilərin və onların fəaliyyətinin ləğv edilməsi haqqında ərizələrin qəbulu sisteminin tətbiqi məqsədilə təkliflərin hazırlanmasına da başlayacaq.
Onun sözlərinə görə, nazirlik sahibkarlıq fəaliyyətinin icbari elektron auditinin təmini məqsədilə təkliflər də hazırlayacaq.