Аzərbaycan, Bakı, 14 mart /Trend/
Yanvarda Azərbaycana 3,2 minə yaxın minik avtomobili idxal olunub ki, bu da ötən ilin analoji dövr göstəricisindən 0,1 faiz azdır. Bu barədə bazar ertəsi Dövlət Statistika Komitəsindən məlumat verilib.
Məlumata görə, ötən il gətirilən minik avtomobillərinin ümumi dəyəri 30,9 milyon dollara yaxındır. Bu, 2010-cu ilin yanvar ayı ilə müqayisədə 11,9 faiz çoxdur.
Yanvarda Azərbaycana 297 ədəd yük avtomobili idxal olunub ki, bu da 2010-cu ilin analoji dövr göstəricisindən 15,4 faiz azdır. Gətirilən avtomobillərin ümumi dəyəri 6,3 milyon dollara yaxın təşkil edib ki, bu da 2010-cu ilin göstəricisindən 47,9 faiz aşağıdır.
Həmçinin, yanvarda respublikaya 63 ədəd avtobus idxal olunub ki, bu da 2010-cu ilin yanvar ayındakı göstəricisindən 36,4 faiz azdır. Bu dövrdə idxal olunan avtobusların məbləği 2,61 milyon dollara yaxın təşkil edib ki, bu da ötən ilin yanvarında qeydə alınan göstəricidən 45,8 faiz azdır.
Bu ilin yanvar-fevralında Azərbaycanda 151 ədəd yük avtomobili istehsal olunub. Eləcə də həmin dövrdə ölkədə 78 minik avtomobili buraxılıb ki, bu da ötən ilin eyni dövrünün göstəricisindən 16,4 faiz çoxdur.
