Azərbaycan, Bakı, 31 may /Trend, müxbir İ.Xəlilova/
Asiya İnkişaf Bankı (AİB) 2011-2012-ci illərdə Azərbaycanda əməliyyatlar üzrə indikativ biznes planının iyunda Direktorlar Şurasında təsdqlənəcəyini gözləyir. Bu barədə çərşənbə axşamı Trend-ə AİB-in Bakı nümayəndəliyindən deyiblər.
"Ölkədə fəaliyyət üçün prioritet istiqamətlər energetika, nəqliyyat və su sektorları seçilib", - nümayəndəlikdən bildiriblər.
Azərbaycan üçün 2011-ci ilin ilkin büdcəsi 340 milyon dollardan 440 milyon dollaradək qiymətləndirilir.
"Ölkə üçün 3 ilə (2011-2013-cü illər) maliyyələşdirmənin son həcmi biznes-planın müəyyənləşdirilməsi zamanı aydınlaşacaq", - AİB nümayəndəliyindən qeyd ediblər.
Bu il Asiya Bankı Masallı-Astara avtomobil yolu layihəsi üçün əlavə maliyyələşdirmə kimi 160 milyon dollar, su təchizatı sisteminin və sanitar xidmətlər sahəsinin yaxşılaşdırılmasına 180 milyon dollar (MFF-in ikinci tranşı) ayırmağı planlaşdırır. Daha bir kredit energetika layihəsi üçün verilə bilər.
Asiya Bankı Azərbaycan ilə biznes-plan əsasında əməkdaşlığı ilk dəfə qurmağa başlayıb. Gələn il fəaliyyət strategiyasının hazırlanacağı gözlənilir.
AİB ölkənin həm dövlət, həm də özəl sektorunda energetika, nəqliyyat, şəhər təsərrüfatı sahələrində layihələr həyata keçirir. Azərbaycan 1999-cu ildən AİB-in üzvüdür. Bankın ölkə üzrə kredit portfeli 700 milyon dollara çatır. Əməkdaşlıq dövrü ərzində AİB Azərbaycan hökumətinə və yerli şirkətlərə ümumi məbləği 13,122 milyon dollar olan qrant ayırıb.
AİB 1966-cı ildə yaradılıb və 67 üzvü var. Bankın mənzil-qərargahı Manilada (Filippin) yerləşir. Azərbaycan AİB üzvlüyünə 22 dekabr 1999-cu ildə qəbul edilib və ölkənin bankın kapitalındakı iştirak payı 0,5 faizdir.
AİB-in aparıcı səhmdarları Yaponiya və ABŞ (ümumi səhmdar kapitalının 31,2 faizi), Hindistan və Çin (12,8 faiz), Avstraliya, Cənubi Koreya, Kanada (16 faiz) və başqalarıdır.