...

Qlobal iqtisadiyyatın canlanması fonunda Azərbaycanın xarici mövqeyində yaxşılaşma meyilləri güclənib - AMB

Biznes və iqtisadiyyat xəbərləri Materials 7 İyun 2011 15:19 (UTC +04:00)

Azərbaycan, Bakı, 7 iyun /Trend, müxbir A.Axundov/

Qlobal iqtisadiyyatın canlanması və enerji daşıyıcılarının qiymətlərinin yüksəlməsi fonunda Azərbaycanın xarici mövqeyində yaxşılaşma meyilləri güclənmişdir. Bu barədə çərşənbə axşamı Azərbaycan Mərkəzi Bankının (AMB) 2011-ci ilin birinci rübünün yekunları üzrə maliyyə sabitliyinə dair hesabatında deyilir.

"Əhali gəlirlərinin və iqtisadiyyata qoyulan investisiyaların artması ölkədə iqtisadi canlanmaya səbəb olub, investisiya aktivliyi yüksəlib. İqtisadi aktivliyin dövlət tərəfindən dəstəklənməsi, mühüm struktur və institusional dəyişikliklərin baş verməsi iqtisadiyyatın dinamikasına müsbət təsir edib", - hesabatda deyilir.

Hesabat dövründə AMB-nin siyasət hədəflərinin başlıca istiqamətlərini inflyasiyanın məqbul səviyyədə saxlanması, manatın məzənnə sabitliyinin qorunması, bank sektorunda sabit inkişafın və dayanıqlığın təmin olunması təşkil edib.

"AMB-nin valyuta bazarında həyata keçirdiyi sterilizasiya əməliyyatları valyuta bazarının tarazlığı və valyuta ehtiyatlarını artırmaqla makroiqtisadi sabitliyin qorunmasına səbəb olub. Hesabat dövründə inflyasiya təkrəqəmli səviyyədə olub və əsasən xarici bazarlardakı proseslərdən, ticarət partnyoru olan ölkələrdə inflyasiyadan təsirlənib", - AMB-nin hesabatında deyilir.

2011-ci ilin martında istehlak mallarının qiymətləri və xidmət tarifləri fevral ayı ilə müqayisədə 1,1 faiz, yanvar-fevralda isə 2010-cu ilin analoji dövrü ilə müqayisədə 9,1 faiz bahalaşıb.

Ərzaq mallarının qiymətləri martda 1,8 faiz artıb, qeyri-ərzaq məhsullarının qiymətləri 0,2 faiz azalıb, xidmət tarifləri isə 0,3 faiz artıb.

2010-cu ilin birinci rübü ilə müqayisədə ərzaq məhsulları 3,4 faiz, qeyri-ərzaq məhsulları 2,8 faiz, xidmətlər isə 3,1 faiz bahalaşıb.

Xəbər lenti

Xəbər lenti