Azərbaycan, Bakı, 5 iyul /Trend, müxbir A.Axundov/
KfW Almaniya İnkişaf Bankı Azərbaycanda infrastruktur layihələrin həyata keçirilməsi üçün kredit şəklində 372 milyon avro və qrant şəklində 25,5 milyon avro ayırıb. Trend-in məlumatına görə, bu barədə çərşənbə axşamı 12-ci Azərbaycan-Almaniya iqtisadi forumunda Azərbaycanın İqtisadi İnkişaf Nazirliyinin Aparat rəhbəri Samir Vəliyev bildirib.
Azərbaycanın KfW ilə əməkdaşlığı 1994-cü ildən başlayıb. Bankın ölkədə strateji fəaliyyət istiqamətləri enerji, su və digər infrastrukturun bərpası, maliyyə, bank, özəl sektor, səhiyyə sisteminin, ətraf mühitin və s. inkişafına dəstək verməkdir.
Əməkdaşlığa başladıqdan etibarən KfW üstünlüyü əsasən Azərbaycan layihələrinin güzəştli maliyyələşdirilməsinə (10 ili güzəştli olmaqla 40 il müddətinə və illik 0,75 faizlə) verib, lakin son illər bank qarışıq şərtlərlə kreditləşməyə keçib.
KfW qrupu kreditlər, kapitala investisiyalar və zəmanətlər verir, eləcə də texniki yardım göstərir.
Bu gün bu maliyyə institutunun tərəfdaşları arasında altı özəl bank, iki mikromaliyyə təşkilatı, Azərbaycanda investisiyalar üçün dörd fond və dörd dövlət institutu var.