Azərbaycan, Bakı, 17 avqust /Trend, müxbir N.İsmayılova/
İlin əvvəlindən İqtisadi İnkişaf Nazirliyinin Sahibkarlığa Kömək Milli Fonduna (SKMF) əvvəllər verilən kreditlərin 64 milyon manatı qaytarılıb. Bu barədə çərşənbə günü fondun icraçı katibi Şirzad Abdullayev deyib.
"2009-cu ildə 56 milyon manatın, 2010-cu ildə 71 milyon manatın qaytarılması təmin olunmuşdusa, bu il bu göstəricinin 91 milyon manat təşkil edəcəyi gözlənilir və proqnozlarımıza görə, 2012-ci ildə bu rəqəm 110 milyon manata çatacaq", - Abdullayev bildirib.
Onun sözlərinə görə, 2012-ci ildə sahibkarlığın inkişafı məqsədilə SKMF-nin xətti ilə güzəştli maliyyələşdirmə üçün dövlət büdcəsinədən ayrılan vəsaitlərin həcminin artacağı gözlənilir.
2011-ci ildə SKMF 92,1 milyon manat məbləğində cəmi 1102 kredit verib. Bu vəsaitlər dəyəri 77,4 milyon manat olan 57 iri və 14,7 milyon manat məbləğdə 1045 kiçik layihənin həyata keçirilməsinə yönəldilib.
2010-cu il ərzində SKMF 115 milyon manat məbləğində 1430 layihəni maliyyələşdirib. 2009-cu ildə SKMF səlahiyyətli kredit təşkilatları vasitəsilə 130 milyon manat məbləğində 2100-dən çox kredit verib.
SKMF 1992-ci ildə yaradılıb. Sahibkarlara kreditlərin verilməsi səlahiyyətli banklar və bank olmayan kredit təşkilatları vasitəsilə həyata keçirilir.
Avqustun 17-nə olan rəsmi məzənnə 0,7865 AZN/USD təşkil edir.
