Azərbaycan, Bakı, 14 sentyabr /Trend, müxbir İ.Xəlilova/
Azərbaycan hökuməti Ümumdünya Ticarət Təşkilatının (ÜTT) işçi qrupu ilə növbəti görüşün (çoxtərəfli danışıqların IX raundu) 2011-ci il noyabrın sonu - dekabrın əvvəllərində keçiriləcəyinə ümid edir. Bu barədə Trend-ə danışıqlar qrupunun rəhbəri, Azərbaycan xarici işlər nazirinin müavini Mahmud Məmmədquliyev deyib.
Azərbaycan tərəfi ÜTT-nin üzv ölkələrinin suallarına cavablarını təqdim edib. Bunun əsasında katiblik "Factual Summary" hazırlayacaq. O, ölkələrə göndəriləcək. Ümid edirik ki, ilin sonunadək işçi qrupla 2011-ci ildə il görüşün keçirilməsinə macal tapacayıq", - nazir müavini vurğulayıb.
Sonuncu görüş [VIII mərhələ] 2010-cu il oktyabrın 18-də keçirilib. Oktyabrın 19-22-də isə ABŞ, Aİ, Kanada, Yaponiya, Norveç, İsveçrə, Çinin Tayvan əyaləti və ÜTT-nin digər üzvləri ilə ticarət və xidmət məsələləri üzrə ikitərəfli danışıqlar aparılıb.
Azərbaycan danışıqlara 2004-cü ildən başlayıb.
Azərbaycan bugünədək Türkiyə, Oman Sultanlığı, Birləşmiş Ərəb Əmirlikləri, Gürcüstanla danışıqları başa çatdırıb və protokollar imzalanıb. Ölkə hələ sənədləri nəzərdən keçirən Moldova ilə protokolun imzalanması mərhələsindədir, Qırğızıstan isə imzalamaya razılıq verib.
Məmmədquliyev yaxın gələcəkdə hər hansı ölkələrdən biri ilə danışıqların başa çatması imkanını istisna etməyərək, həmin ölkənin adını çəkməkdən imtina edib.
Danışıqlar çərçivəsində Azərbaycan milli hüquqi bazanın ÜTT-nin tələblərinə uyğunlaşdırılması, qüvvədə olan ticarət rejiminin təkmilləşdirilməsi üzrə işləri davam etdirir. Təxminən 40-50 qanunvericilik aktı təşkilatın tələblərinə uyğunlaşdırılmalıdır ki, onlardan təxminən 30 sənəd artıq vahid şəklə salınıb və gələn il bu istiqamətdə işlər davam etdiriləcək.
Ötən il ÜTT katibliyi Azərbaycan üzrə işçi qrupunun tərkibini genişləndirib və oraya daha dörd ölkəni - Ukrayna, Braziliya, Ekvador və İsveçrəni daxil edib. Bunun nəticəsində işçi qrupunun üzvlərinin ümumi sayı Aİ-nin 27 ölkəsi də daxil olmaqla, 32-yə çatıb.
ÜTT yanında Azərbaycan üzrə işçi qrupu 1997-ci il iyulun 16-da yaradılıb.
Azərbaycan 1997-ci ildən Ümumdünya Ticarət Təşkilatında müşahidəçi statusunda təmsil olunur.
