Azərbaycan, Bakı, 24 sentyabr /Trend, müxbir İ.Xəlilova/
Bazar günü Almaniya İnkişaf Bankı - KfW-nin maliyyə layihələri ilə bağlı ölkə üzrə yeni meneceri Kurt Ştrasserin Azərbaycana səfəri başlayır. O, Azərbaycan hökumətinə təqdim olunacaq. Bu barədə Trend-ə şənbə günü KfW-nin Bakı nümayəndəliyindən bildirilib.
"Bank 2011-ci ilin sonunadək Azərbaycan üzrə maliyyə layihələri ilə bağlı yeni menecerin təyin edilməsini planlaşdırır. O, KfW nümayəndə heyətinin tərkibində Bakıya gəlir", - ofisdən deyiblər.
Nümayəndə heyətinə bankın ölkə üzrə fəaliyyətdə olan meneceri Herald Hyuqner rəhbərlik edir. Ştrasser onu bu vəzifədə cari ilin sonunadək əvəz edəcək.
Səfər zamanı Ştrasser ölkədə bankın fəaliyyəti ilə tanış olacaq, Azərbaycan Mərkəzi Bankında, KfW tərəfdaşları olan banklar və əməkdaşlığın qurula biləcəyi yeni banklarla bir sıra görüşlər keçirəcək. Həmçinin, alman bankının nümayəndələri KfW-nin 20 faiz hissələrinə malik olduğu AccessBank-ın təsisçilər iclasında da iştirak edəcək.
Azərbaycanın KfW ilə əməkdaşlığı 1994-cü ildən başlayır. Fəaliyyətin strateji istiqamətləri energetika, su və digər infrastrukturlarınıbərpa olunması, maliyyə və bank, özəl sektor və səhiyyə sisteminin inkişafına dəstək və s.-dir.
Əməkdaşlığın başlanğıcında KfW Azərbaycan layihələrinin əsasən güzəştli maliyyələşdirilməsinə üstünlük verib (10 il güzəşt müddətli illik 0,75 faizli 40 illik kredit). Lakin son illərdə bank qarışıq şərtlərlə kreditləşdirmə sisteminə keçib.
KfW qrupu kredit, kapitala investisiya və zəmanətlər, eyni zamanda, texniki əməkdaşlıq təqdim edir.
