Azərbaycan, Bakı, 11 oktyabr /Trend, müxbir E.İsmayılov/
Ələt qəsəbəsində (Bakı yaxınlığında) beynəlxalq dəniz limanının tikintisinin bütün üç mərhələsinin həyata keçirilməsi Azərbaycan hökumətinə 870 milyon manata başa gələcək. Trend-in məlumatına görə, bu barədə Azərbaycanın nəqliyyat naziri Ziya Məmmədovun çərşənbə axşamı "Respublika" qəzetində dərc olunan məqaləsində deyilir.
"Limanın tikintisinin birinci və əsas mərhələsi 540 milyon manat qiymətləndirilib. İkinci və üçüncü mərhələlərin dəyəri isə müvafiq olaraq 150 və 180 milyon manat təşkil edir", - nazir deyib.
Məmmədovun sözlərinə görə, tikinti işlərinin yekunlaşmasından sonra yeni limanda yeni iş yerlərinin sayı üç mini ötəcək.
Yeni beynəlxalq limanın tikintisinə 2010-cu ilin noyabr ayında başlanıb. Liman Bakıdan 65 kilometr cənubda Ələt qəsəbəsində yerləşir.
Əvvəllər planlaşdırıldığı kimi, Ələt qəsəbəsində yeni beynəlxalq limanın tikintisi üç mərhələdə həyata keçiriləcək və 2015-ci ilə qədər yekunlaşdırılmalıdır. İlk mərhələ konteynerlərin, "ro-ro" tipli gəmilərin və adi (universal) quru yük daşıyanların qəbul edilməsi üçün iki bərə, üç yük körpüsünün tikintisini nəzərdə tutur. Layihənin ikinci mərhələsi daha üç yük körpüsünün, üçüncü mərhələ isə iki əlavə yük körpüsünün tikintisini nəzərdə tutur. Liman 11,6 milyon tona qədər yük qəbul edə biləcək.
Ələtdəki liman multimodal olacaq, belə ki, maddi-texniki mərkəzlə yanaşı, gələcəkdə bu ərazidə azad iqtisadi zonanın yaradılması planlaşdırılır.
Oktyabrın 11-nə olan rəsmi məzənnə 0,7869 AZN/USD təşkil edir.
