Azərbaycan, Bakı, 10 noyabr /Trend, müxbir A.Tağıyeva/
Azərbaycan Türkiyədən toyuq yumurtası idxal edən ölkələr arasında İraq və İrandan sonra üçüncü yeri tutur. Bu barədə cümə axşamı Trend "Haberler" qəzetinə istinadən məlumat verir.
Türkiyə yanvar-oktyabrda Azərbaycana 8,7 milyon dollar dəyərində toyuq yumurtası ixrac edib. Öz növbəsində, İraqa və İrana ixracat müvafiq olaraq 155 və 34,8 milyon dollar təşkil edib.
Oktaybrın 31-nə olan vəziyyətə görə, Türkiyənin toyuq yumurtası ixracının ümumi həcmi 223 milyon dollar səviyyəsində olub. Bu isə ötən ilin analoji dövri ilə müqayisədə 87 faiz çoxdur. Ölkə 2011-ci ilin sonuna qədər bu məhsulun ixrac həcmini 250 milyon dollar səviyyəsinə çatdırmağı planlaşdırır. Türkiyə 24 ölkəyə toyuq yumurtası ixrac edir.
Azərbaycan Dövlət Statististika Komitəsinin hesabatına görə, doqquz ay ərzində ölkədə 759,5 milyon ədəd toyuq yumurtası istehsal edilib. Bu da 2010-cu ilin eyni dövrü ilə müqayisədə 15,9 faiz azdır.
Azərbaycan gələn ildən qonşu ölkələrə damazlıq yumurtaların ixracına başlayacaq.
Azərbaycan İqtisadi İnkişaf Nazirliyi yanında Sahibkarlığa Kömək Milli Fondunun icraçı direktoru Şirzad Abdullayevin əvvəllər dediyinə görə, 2009-cu ilin statistikası göstərir ki, ölkədə 60 milyon damazlıq yumurtaya tələbat var. Tələbatın 40-45 faizi yerli istehsal hesabına ödənilib, qalan hissə isə ixrac edilir.
Bununla əlaqədar SKMF quşçuluq təsərrüfatlarının yaradılması üzrə layihələri maliyyələşdirir.
