Azərbaycan, Bakı, 12 dekabr /Trend, müxbir N.İsmayılova/
"Citadele banka"nın nümayəndəliyi Azərbaycan Mərkəzi Bankı və Latviyanın Maliyyə və Kapital bazarları üzrə Komissiyası arasında əməkdaşlıq haqqında memorandumun imzalanmasından sonra Azərbaycanda dövlət qeydiyyatından keçəcək. Bu barədə bazar ertəsi Trend-ə bankın ölkədəki nümayəndəliyinin rəhbəri Andreys Krivans deyib.
"Biz ümid edirik ki, Azərbaycan Mərkəzi Bankı və Latviyanın Maliyyə və Kapital bazarları üzrə Komissiyası arasında əməkdaşlıq haqqında memorandumun imzalanması ölkələr arasında maliyyə sektorunda əməkdaşlığın genişləndirilməsində öz rolunu oynayacaq və "Citadele banka"nın ölkədə nümayəndəliyinin fəaliyyəti üçün icazənin verilmə prosesini sürətləndirəcək", - Krivans deyib.
Onun sözlərinə görə, memorandumun imzalanması cari ilin sonunda və ya gələn ilin əvvəlində gözlənilir.
O deyib ki, "Citadele banka"nın nümayəndəliyinin qeydiyyatdan keçməsindən sonra ölkədə "Parex Banka"nın nümayəndəliyi bağlanacaq. Buna zərurət Latviya bankında struktur dəyişiklikləri ilə bağlı yaranıb. Belə ki, o, iki banka - "Parex Banka" və "Citadele banka" bölünüb.
Bankın bölünməsi aşağıdakı prinsip üzrə aparılır: yaxşı aktivlər "Citadele banka"ya köçürüləcək, işləməyən aktivlər isə yeni bankın yaxşı balansa malik olması və sabit gəlirlə işləməsi üçün "köhnə bank"da qalacaq. "Parex banka" "Citadele banka"nı yaratmaqla öz mövqeyini Azərbaycanda qoruyub saxlayacaq.
"Citadele banka" SC "Parex banka" SC-nin restukturizasiya planı çərçivəsində yaradılan kredit müəssisəsidir və onun təsisçisi "Privatizācijas aģentūra" DSC-dir. Bu il avqustun 1-dən aktivlərin bölünməsi prosesi aparılıb və "Citadele banka" yaradılıb. "Parex banka"nın restukturizasiyası prosesində yaranan yeni bankın səhmlərinin 25 faizi Avropa Yenidənqurma və İnkişaf Bankına (AYİB) məxsus olacaq.
"Parex banka" 1992-ci ildə yaradılıb. Bankın nümayəndəlikləri, filialları və törəmə müəssisələri dünyanın 12 ölkəsində yerləşir. Eləcə də Berlin, Stokholm və Tallində filiallara malikdir. Azərbaycanda bankın nümayəndəliyi fəaliyyət göstərir.
Azərbaycan üzrə bankın ümumi portfeli 200 milyon dollar təşkil edir. Buraya ölkədəki törəmə lizinq strukturlarının portfeli və kredit xətləri daxildir.
