Azərbaycan, Bakı, 10 yanvar /Trend, müxbir N.İsmayılova/
Azərbaycan bankı "Unibank" 2012-ci ilin birinci yarısında nizamnamə kapitalını artırmağı planlaşdırır. Bu barədə Trend-ə çərşənbə axşamı bankdan məlumat veriblər.
"Biz nizamnamə kapitalını müntəzəm şəkildə artırırıq. Belə ki, son iki il ərzində, demək olar, üç dəfə artırılıb və hazırda artırılmasına yenidən ehtiyac var", - bankdan bildiriblər.
Bankdan deyildiyi kimi, nizamnamə kapitalının bankın gəlirləri hesabına artırılması planlaşdırılır. Dekabrın 1-nə Unibank-ın xalis əməliyyat gəlirləri 6,5 milyon manat təşkil edib.
Unibank-ın ödənilmiş nizamnamə kapitalı 44 919 360 manatdır. Hər bir səhmin nominal dəyəri 2,16 manat təşkil edir. Bankın reyestrsaxlayıcısı kimi Milli Depozit Mərkəzi çıxış edir.
Dekabrın əvvəlinə olan məlumata görə, bankın məcmu kapitalı 58,57 milyon manat təşkil edir.
"Unibank" 2002-ci il oktyabrın 15-də iki özəl kommersiya bankı - "Mbank" və "Promtekhbank"ın birləşməsi nəticəsində yaranıb. "Unibank" universal maliyyə-kredit müəssisəsidir, pərakəndə və korporativ xidmətlər təklif edir.
Avropa Yenidənqurma və İnkişaf Bankı (15,1515 faiz) və DEG Almaniya İnvestisiya Korporasiyası (8,3333 faiz) kimi maliyyə institutları bankın səhmdarlarıdır. Bank 24 filial və şöbəsi vasitəsilə Bakıda, Sumqayıtda və Azərbaycanın daha altı əsas rayonunda 172 mindən artıq müştəriyə xidmət göstərir.
Yanvarın 10-na olan rəsmi məzənnə 0,7863 AZN/USD təşkil edir.
