Gürcüstan, Tbilisi, 16 fevral /Trend, müxbir N.Kirsxaliya/
Avqustda Azərbaycanda Gürcüstan-Azərbaycan-Türkiyə iqtisadi əməkdaşlığı çərçivəsində növbəti görüş keçiriləcək. Trend-in məlumatına görə, bu barədə Tbilisidə jurnalistlərə Türkiyənin iqtisadiyyat naziri Zəfər Çağlayan bildirib.
Gürcüstan, Azərbaycan və Türkiyənin iqtisadiyyat nazirləri Tbilisidə Gürcüstan-Azərbaycan-Türkiyə biznes forumunda iştirak edib və qapalı görüşün yekunları üzrə birgə brifinq keçiriblər.
Çağlayanın qeyd etdiyi kimi, bu format üç ölkənin iqtisadiyyat nazirləri tərəfindən daha sıx əməkdaşlıq məqsədilə seçilib.
"Biz iqtisadi əlaqələrimizi dərinləşdirmək fikrindəyik, çünki bizim regionumuzun qarşısında ciddi tapşırıqlar durur", - o bildirib.
Türkiyəli nazirin sözlərinə görə, Türkiyədə və Azərbaycanda qadınlara çox hörmət edirlər və buna görə də birinci görüşün aparılması hüququ Gürcüstan iqtisadiyyat naziri xanım Vera Kobaliyaya verildi.
Növbəti görüş isə may ayında Türkiyədə keçiriləcək.
Çağlayan həm üç ölkə arasında iqtisadi əməkdaşlığın səviyyəsindən, həm də investisiya layihələrinin həyata keçirilməsinin gedişindən razı qaldığını bildirib.
"Bizim çoxsaylı iş adamlarımız Gürcüstanda və Azərbaycanda çalışır, ölkələrimizin birgə iri enerji və infrastruktur layihələrinin iştirakçıları olması daha da vacibdir", - o qeyd edib.
