Azərbaycan, Bakı, 26 aprel /Trend, müxbir Ə.Həsənov/
Azərbaycanda kiçik və orta sahibkarlığın inkişafı üzrə beş milyon avro məbləğində üçüncü güzəştli kreditlə bağlı maliyyə müqaviləsinin imzalanması Almaniyanın KfW İnkişaf Bankının Bakıda olan missiyasının fəaliyyətinin yekunu olaraq gözlənilir.
Bu barədə cümə axşamı Trend-ə Almaniya-Azərbaycan Fondunun (AAF) layihələr üzrə meneceri Eduard Şmidt bildirib.
Bankın missiyasına KfW-nin Azərbaycanda maliyyə layihələri üzrə meneceri Kurt Ştrasser rəhbərlik edir.
"KfW-nin missiyası artıq bir həftədir Bakıdadır. O, hökumət və yerli banklarla görüşlər keçirir və imzalanmaq üçün sənədlər hazırlanır", - bankın Bakıdakı ofisindən bildiriblər.
Bank üçüncü krediti Azərbaycanın milli valyutasında vermək və məzənnə fərqinin dəyişməz riskini öz üzərinə götürmək fikrindədir. Əvvəlki iki kredit kimi, KfW üçüncü krediti də güzəştli şərtlərlə, yəni 10 illik güzəşt dövrü və 0,75 faiz illik dərəcə ilə 40 il müddətinə verir.
İlk iki kredit kimi bu vəsaitlər Almaniya-Azərbaycan Fondu vasitəsilə kiçik və orta sahibkarlığın maliyyələşdirilməsi üçün nəzərdə tutulub.
