Azərbaycan, Bakı, 29 may /Trend, müxbirlər İ.Xəlilova, A.Tağıyeva/
Növbəti "Gürcüstan-Azərbaycan-Türkiyə" biznes-forumu iyunun 9-da Türkiyənin Qars şəhərində keçiriləcək. Bu barədə Trend-ə çərşənbə axşamı Türkiyənin iqtisadiyyat naziri Zəfər Çağlayan bildirib.
"Əvvəlki forum Tbilisidə keçirilib, cari forumun Qarsda keçirilməsi planlaşdırılır, növbəti forum isə Bakıda baş tutacaq", - Çağlayan deyib.
Onun sözlərinə görə, Türkiyənin Baş naziri Rəcəb Tayyib Ərdoğan ölkənin İqtisadiyyat Nazirliyinə Azərbaycanla iqtisadi münasibətlərin həlli ilə əlaqədar göstəriş verib.
"Türkiyə və Azərbaycan arasında iqtisadi münasibətlər ildən-ilə artır. Lakin biz bunu qaneedici hesab etmirik, çünki bu münasibətlərin potensialı xeyli çoxdur. Azərbaycan və Türkiyə əmtəə dövriyyəsinin artırılmasına və iqtisadi münasibətlərin daha yüksək səviyyədə inkişafına istiqamətləniblər", - Çağlayan qeyd edib.
2011-ci ilin yekunları üzrə Azərbaycan və Türkiyə arasında əmtəə dövriyyəsi 3,5 milyard dollaradək artıb.
Nazir Azərbaycan investisiyalarının Türkiyə iqtisadiyyatına yatırılmasının, xüsusən Azərbaycan Respublikası Dövlət Neft Şirkətinin (ARDNŞ) investisiyalarının Türkiyənin enerji sektoruna qoyulmasının vacibliyini də vurğulayıb.