Azərbaycan, Bakı, 2 iyun /Trend, müxbir A.Axundov/
2012-ci ilin yanvar-may aylarında avtonəqliyyat vasitəsi sahiblərinin mülki məsuliyyətinin icbari sığortası üzrə İcbari Sığorta Bürosunun informasiya sistemi vasitəsilə 388,8 min sığorta müqaviləsi bağlanıb. Bu barədə şənbə günü Trend-ə bürodan bildiriblər.
Məlumata əsasən, bu müqavilələrin 80,8 minini xarici ölkədə qeydiyyata alınmış və Azərbaycan Respublikasına tranzit məqsədilə daxil olan avtonəqliyyat vasitələri ilə bağlı olan və bir ay müddətinə bağlanan sığorta müqavilələri təşkil edib.
"Bağlanmış sığorta müqavilələri üzrə daxil olan sığorta haqlarının ümumi məbləği 29,2 milyon manat olub", - bürodan qeyd ediblər.
Cari ilin may ayı ərzində isə avtonəqliyyat vasitəsi sahiblərinin mülki məsuliyyətinin icbari sığortası üzrə ümumilikdə 118,4 min sığorta müqaviləsi bağlanıb ki, bunların da 19,1 minini xarici ölkədə qeydiyyata alınmış və Azərbaycan Respublikasına tranzit məqsədilə daxil olan avtonəqliyyat vasitələri ilə bağlı olan və bir ay müddətinə bağlanan icbari sığorta müqavilələri təşkil edib. May ayı ərzində bağlanmış icbari sığorta müqavilələri üzrə daxil olan sığorta haqlarının məbləği isə ümumilikdə 8,9 milyon manat olub.
"Mayda avtonəqliyyat vasitəsi sahiblərinin mülki məsuliyyətinin icbari sığortası üzrə müqavilələrin sayı və bu müqavilələr üzrə sığorta haqlarının həcmi aprellə müqayisədə, müvafiq olaraq, 3,77 faiz və 1,55 faiz artıb", - bürodan deyiblər.
İyunun 1-nə olan məlumata görə, avtonəqliyyat vasitəsi sahiblərinin mülki məsuliyyətinin icbari sığortası üzrə ölkədə olan avtomobillərin 37 faizdən çoxunun sahibinin mülki məsuliyyəti sığortalanıb.
2012-ci ilin yanvar-may aylarında avtonəqliyyat vasitəsi sahiblərinin mülki məsuliyyətinin icbari sığortası üzrə mükafatlar 2011-ci ilin analoji dövründə sığortanın bu növü üzrə yığımlarla müqayisədə 15,79 dəfə artıb. Belə çoxalma bu növ üzrə mükafatların məbləğinin xeyli artması ilə bağlıdır.
