Azərbaycan, Bakı, 17 oktyabr /Trend, müxbir H.Vəliyev/
Yanvar-sentyabr aylarının yekunu üzrə Azərbaycanın metallurgiya sənayesi və hazır metal məmulatları istehsal edən müəssisələri tərəfindən 341,8 milyon manat məbləğində məhsul istehsal edilib və xidmət göstərilib. Trend-in məlumatına görə, bu barədə Dövlət Statistika Komitəsinin hesabatında deyilir.
Metallurgiya sənayesində istehsalın həcmi 16,6 faiz, hazır metal məmulatlarının istehsal həcmi isə 70,5 faiz artıb.
9 ayın yekunları üzrə tökmə çuqun istehsalı 746 ton təşkil edib ki, bu da 2011-ci ilin analoji dövr göstəricisindən 2,8 dəfə çoxdur. Yanvar-sentyabr aylarının yekunu üzrə 164,1 min ton tökmə polad, 47,3 min ton polad boru istehsal edilib.
Qara metallardan hazırlanan yarımfabrikatların ixrac həcmi, yanvar-sentyabr aylarının yekunlarına əsasən, 93,1 min ton təşkil edib (təqribən 50 milyon dollar) ki, bu da 2011-ci ilin analoji göstəricisindən 39,1 faiz (pulla ifadədə 29,8 faiz) azdır.
9 ayın yekunları üzrə qara metallardan hazırlanan boruların ixracı 31,8 min ton (30,5 milyon dollardan artıq məbləğdə) təşkil edib ki, bu da 2011-cu ilin müvafiq dövr göstəricisindən 51 faiz (pulla ifadədə 55,3 faiz) azdır.