Azərbaycan, Bakı, 27 oktyabr /Trend/
Sentyabrın əvvəlinə Azərbaycan regionlarında əhaliyə verilən kreditlər 1429,67 milyon manat və ya bankların kredit portfelinin ümumi həcminin 12,8 faizini təşkil edib. Trend-in məlumatına görə, bu barədə şənbə günü Azərbaycan Mərkəzi Bankının (AMB) statistik hesabatında deyilir.
AMB-nin məlumatına görə, Bakı üzrə bu göstərici 9 728,13 milyon manat təşkil edib ki, burada milli valyutada verilən kreditlərin payına 6 403,7 milyon manat düşüb.
Sentyabrın əvvəlinə ölkədə orta faiz dərəcəsi 15,5 faiz, Bakı üzrə isə 14,8 faiz təşkil edib.
Kreditləşmənin həcmi Abşeron iqtisadi rayonu üzrə orta faiz dərəcəsi 18 faiz olmaqla 344,13 milyon manat, Aran iqtisadi rayonu üzrə 22,6 faizlə 313,1 milyon manat, Dağlıq Şirvan iqtisadi rayonu üzrə 21,6 faizlə 34,4 milyon manat, Gəncə-Qazax iqtisadi rayonu üzrə 20,8 faizlə 306,6 milyon manat, Quba-Xaçmaz - 19,9 faizlə 124,3 milyon manat, Lənkəran - 24,1 faizlə 125,25 milyon manat, Şəki-Zaqatala - 23,4 faizlə 85,7 milyon manat, Yuxarı Qarabağ - 22,4 faizlə 14,5 milyon manat, Kəlbəcər-Laçın - 18,2 faizlə 2,7 milyon manat, Naxçıvan - 11,9 faizlə 78,9 milyon manat olub.
Azərbaycanda kreditlərin böyük hissəsi ev təsərrüfatlarına verilir. AMB-nin məlumatına görə, 2012-ci ilin yanvar-avqust ayları ərzində ev təsərrüfatlarına 35,3 faiz və ya 3942,2 milyon manat kredit verilib.
İkinci yerdə ticarət və xidmət (25,8 faiz və ya 2873,6 milyon manat kredit), üçüncü yerdə tikinti, mülk sahələri (9,5 faiz və ya 1063,7 milyon manat) qərarlaşıb.
Sənaye və istehsalatın payına 5,8 faiz (644,1 milyon manat), kənd təsərrüfatı və emala 4,6 faiz (516,4 milyon manat), nəqliyyat və rabitəyə 3,8 faiz (420,1 milyon manat), enerji, kimya və təbii resurslar 3,6 faiz (400,2 milyon manat), qalan sahələrin payına isə 0,4 faiz və ya 42,9 milyon manat düşüb.
Azərbaycan bankları 2012-ci ilin 8 ayı ərzində ümumilikdə iqtisadiyyatın kreditləşdirilməsini 8,8 faiz, 2011-ci ilin analoji dövrü ilə müqayisədə isə 18,7 faiz artıraraq 11157,8 milyon manata çatdırıblar.
