Azərbaycan, Bakı, 5 noyabr /Trend, müxbir A.Axundov/
Dünya Bankı (DB) və Azərbaycan hökumətinin təhsil sahəsində gələcək əməkdaşlığı ölkədə hazırlanan milli təhsil strategiyası ilə əlaqələndiriləcək. Bu barədə bazar ertəsi Trend-ə bankın ölkə üzrə direktoru Səidə Bağırlı bildirib.
"Biz təhsil sahəsində strategiyanın hər hansı konkret forma alacağını gözləyirik və gələcəkdə bütün intervensiyaları bu strategiyaya, o cümlədən ali təhsil sahəsində mümkün layihəyə uyğun etmək düzgün olardı", - Bağırlı qeyd edib.
Onun sözlərinə görə, DB-nin mütəxəssisləri strategiyanın hazırlanması işləri çərçivəsində konsultasiyalarda iştirak edirlər.
"Biz ilkin sənədləri nəzərdən keçirdik, lakin yekun versiyanı hələ görməmişik. Bank Azərbaycan nümayəndə qruplarının Sinqapurda tanışlıq turlarını təşkil etməyə yardım edib. Məqsəd onların sxemini öyrənməkdir", - Bağırlı vurğulayıb.
