Azərbaycan, Bakı, 13 noyabr /Trend, müxbir A.Axundov/
Azərbaycan xidmətlər sektorunun ÜDM-də payının 2011-ci ildə 25,9%-dən 2016-cı ildə 38,5%-ə qədər artacağını proqnozlaşdırır ki, bu da iqtisadiyyatın sahəvi strukturunun daha da təkmilləşəcəyini göstərir. Trend-in məlumatına görə, bu barədə çərşənbə axşamı iqtisadi inkişaf naziri Şahin Mustafayev Milli Məclisdə 2013-cü il və növbəti 3 il üçün dövlət büdcəsi haqqında qanun layihəsinin müzakirəsi zamanı deyib.
Onun sözlərinə görə, xidmətlər sektorunda artım 2013-cü ildə 10,7%, növbəti üç ildə isə orta hesabla 7,8% təşkil edəcək.
"Turizm sektorunda 2013-2016-cı illər ərzində orta hesabla 21,9% artım gözlənilir. Orta müddətli dövrdə informasiya və rabitə sektorunun dinamik artımı davam edəcək. Belə ki, 2013-cü ildə bu sahədə 10,9%, növbəti 3 ildə orta illik 10,1%, nəqliyyat sektorunda müvafiq olaraq 6,9 faiz və 6 faiz, sosial və digər xidmətlərdə - 8,6 və 5,3 faiz, ticarətdə isə 13%, növbəti üç ildə isə 9,3% orta illik artım proqnozlaşdırılır", - Mustafayev deyib.
Nazir bildirib ki, qeyri-neft ÜDM-nin dinamik artımı qeyri-neft ixracının da artmasına müsbət təsir edəcək.
"Belə ki, qeyri-neft ixracı 2013-cü ildə 19,9%, sonrakı 3 ildə isə orta hesabla 19,1% artacaq", - o deyib.
Xarici ticarət saldosunun 2013-2016-cı illər ərzində orta hesabla 16,1 milyard dollar təşkil edəcəyi proqnozlaşdırılır.
