Azərbaycan, Bakı, 30 iyul /Trend, müxbir İ.Xəlilova/
Azərbaycanlı sahibkarlar Azərbaycan ilə Rusiya arasında qarşılıqlı investisiyaların qorunmasına dair saziş mövcud olmasa da, bu ölkənin iqtisadiyyatına ciddi investisiyalar yatırmağa hazırlaşırlar. Bu barədə çərşənbə axşamı Trend-ə Rusiyanın Azərbaycandakı ticarət nümayəndəsi Yuri Şedrin deyib.
Onun sözlərinə görə, hazırda raşılaşdırma prosesi, həmçinin Rusiyanın Çelyabinsk, Qaraçay-Çərkəz, Krasnodar, Moskva və digər regionları üzrə danışıqlar aparılır.
Şedrin bildirib: "Azərbaycan investorları Rusiya bazarında aktivləşiblər. Onlar hazırdırlar və artıq Rusiyanın iqtisadi və sosial sahəsinə və regionlarına ciddi yatırımların nümunələri var".
Onun sözlərinə görə, iki ölkə qarşılıqlı investisiyaların qorunması haqqında saziş layihəsi üzrə güzəştli qərar qəbul edə bilmir.
Bu sazişin bağlanmamasının əsas səbəbi milli sektorların müəyyənləşdirilməsi üzrə prinsipial fikir ayrılıqlarının olmasıdır. Rusiya tərəfi milli sektorlar müəyyənləşdirilmədən sazişi imzalamayacaq, Azərbaycan isə öz mövqeyindən çəkilmək niyyətində deyil.
Şedrin bildirib: "Qarşıdakı yüksək səviyyəli görüş çərçivəsində (Rusiya Prezidenti Vladimir Putinin avqustda Bakıya səfəri gözlənilir) sazişin imzalanmayacağı birmənalıdır, buna görə də sahibkarlar hələlik mövcud qaydalar çərçivəsində işləməli olacaqlar".