Azərbaycan, Bakı, 14 avqust /Trend, müxbir E. Əliyev/
Vergilər Nazirliyinin 195 Çağrı Mərkəzinə bu ilin yanvar-iyul aylarında 159 min 738 müraciət daxil olub ki, bu da ötən ilin analoji dövri ilə müqaisədə 22,4 faiz artıb.
Trend-in məlumatına görə, bu barədə Vergilər Nazirliyinin rəsmi saytında bildirilib.
"Telefon Məlumat Xidmətinə daxil olmuş müraciətlərin 107 min 108-i canlı rejimdə müfəttiş-operatorlar, 52 min 630-u səsli menyu vasitəsilə elektron operator tərəfindən cavablandırılıb. Vergi ödəyicilərinə 265 193 mesaj göndərilməklə onların məlumatlandırılması təmin edilib", - məlumatda deyilir.
Müfəttiş-operatorlar tərəfindən cavablandırılmış suallar arasında 13,2% vergi növləri, 22,5% elektron xidmətlər, 11,6% hesabatlar və onların doldurulma qaydaları, 11,5% qeydiyyat barədə suallar, 51,2% səsli menyu vasitəsilə qəbul edilmiş müraciətlər arasında isə vergi növləri və 26,7% dövlət büdcəsinə olan vergi borcları barədə müraciətlər üstünlük təşkil edib.
Canlı rejimdə vergi ödəyicilərindən daxil olan sual xarakterli müraciətlərin 98,4%-i müfəttiş-operatorlar tərəfindən dərhal, 1,6%-i isə sual vərəqəsi tərtib edilərək araşdırıldıqdan sonra cavablandırılıb. Müraciətlərin 72,9%-i Bakı şəhərindən, 11,4%-i mobil operatorlardan, qalanı isə ölkənin müxtəlif bölgələrindən daxil olub.