Azərbaycan, Bakı, 2 aprel /Trend, müxbir E.Əliyev/
Avropa İttifaqı (Aİ) və Azərbaycan arasında assosiasiya haqqında saziş üzərində iş davam edir. Trend-in məlumatına görə, bunu jurnalistlərə Aİ-nin Azərbaycandakı nümayəndəliyinin rəhbəri xanım Malena Mard deyib.
Onun sözlərinə görə, danışıqlar davam edir: "Deyə bilərəm ki, işlər fəal şəkildə aparılır və tərəflər bu sazişin bir çox maddələri üzrə razılığa gəliblər. Ümid edirik ki, cari ildə assosiativ saziş üzərində iş aktivləşdiriləcək".
M.Mard qeyd edib ki, bu sazişin bağlanması gələcəkdə Aİ-Azərbaycan əməkdaşlığının yeni hüquqi bazasını müəyyənləşdirəcək.
Assosiativ saziş 4 istiqamətdən ibarətdir: siyasi dialoq, o cümlədən təhlükəsizlik, ədliyyə və insan haqlarının müdafiəsi məsələləri, iqtisadi və sosial-humanitar məsələlər, eləcə də ticarət. Danışıqlar bütün bu istiqamətlər üzrə aparılır.