Adambaşına düşən minimal istehlak səbəti ayda orta hesabla 244 357,7 manat (48,9 AZN) təşkil edib. Dövlət Statistika Komitəsindən Trend ə verilən məlumata görə, istehlak səbəti sorğunun nəticələrinə, eyni zamanda Dünya bankının metodologiyası və tövsiyələrinə uyğun olaraq hesablanıb. Buna əsaslanaraq 2005-ci ildə ölkənin bütün iqtisadi rayonlarında reprezentativ seçmə qaydada 8557 ev təsərrüfatından 32875 nəfər sorğuya cəlb olunub. Ümumi istehlak səbətində ərzaq məhsullarının dəyəri 57,9%, qeyri-ərzaq mallarının dəyəri - 22,5%, xidmətlərin dəyəri isə 19,6% təşkil edir.
Ayrı-ayrı sosial-demoqrafik qruplar üzrə göstəricilər belədir: 212 879,2 manat (42,6 AZN) - 16-yaşadək uşaqlar üçün, 259 054,1 manat (51,8 AZN) - əmək qabiliyyətli yaşlı əhali üçün, 202 013,6 manat (40,4 AZN) - əmək qabiliyyətli yaşdan yuxarı əhali üçün.
Yoxsulluq səviyyəsi 29,3% təşkil edir. Əhalinin inflyasiya nəzərə alınmaqla aylıq gəliri 213 min manatdır.