Bu gün Mərakeş krallığının kənd təsərrüfatı, kənd rayonlarının və balıqçılığın inkişafı naziri Moxand Lansarın Azərbaycanın Kənd Təsərrüfatı Nazirliyinin başçısı İsmət Abasovla görüşü baş tutub. Bu barədə Trend ə Azərbaycanın Kənd Təsərrüfatı Nazirliyindən xəbər veriblər.
Görüş zamanı, demək olar ki, kənd təsərrüfatı sahəsinin bütün istiqamətləri üzrə əməkdaşlıq məsələləri müzakirə edilib. Mərakeş tərəflər arasında əməkdaşlıq haqqında sazişin imzalanması zərurətini xüsusi olaraq qeyd edib. Bununla bağlı Azərbaycan tərəfi yaxın vaxtlarda öz adından sazişin layihəsini hazırlamağı və baxılması üçün Mərakeş tərəfinə təqdim etməyi öhdəsinə götürüb.
Bundan başqa, Mərakeş zəngin fosfat yataqlarına malik olduğundan, İ.Abbasov M.Lansara Sumqayıtda Superfosfat zavodunun fəaliyyətinin bərpası istiqamətində əməkdaşlıq təklif edib. Həmçinin Azərbaycan bölgələrində sitrus və zeytun bağlarının yaradılması potensialı xüsusi olaraq qeyd olunub. Heyvandarlıq sahəsi də diqqətsiz qalmayıb. Tərəflər bu istiqamətdə elmi tədqiqatların aparılmasında əməkdaşlığın inkişafında maraqlı olduqlarını bildirib.
Görüşdə krallığın naziri əməkdaşlığın istiqamətlərinin daha konkret müəyyənləşdirilməsi məqsədi ilə İ.Abbasovu və Kənd təsərrüfatı Nazirliyinin mütəxəssislərini Mərakeşə dəvət edib.
Mərakeşin nümayəndə heyətinin Azərbaycana səfəri bu gün səhər başlayıb və avqustun 17-də axşam başa çatacaq.