Qars-Axalkalaki-Tbilisi-Bakı marşrutu üzrə dəmir yolu nəqliyyatının açılış layihəsində Gürcüstanın payının Azərbaycan höküməti adından kreditoru qismində Azərbaycan Beynəlxalq Bankı çıxış edə bilər. Nəqliyyat nazirinin müavini Musa Pənahovun bildirdiyi kimi, bu bank kifayət qədər böyük vəsaitlərə malikdir. Bu barədə Trend xəbər verir.
Hazırda gürcü hissəsinin Türkiyə və Azərbaycan hökümətləri tərəfindən ödəyəcəyi payın müəyyənləşdirilməsi üçün Türkiyə tərəfi ilə danışıqlar aparılır. "Hazırda Gürcüstana kreditin verilmə şərtləri (faizlər, qaytarma müddəti) hələ diskussiyaların mövzusudur. Kredit uzunmüddətli olacaq, lakin mən bir şeydən əminəm ki, kredit vaxtından əvvəl qaytarılacaq, belə ki, bu istiqamətdə gözlənilən axın həcmi kifayət qədər böyükdür", - deyə nazir müavini qeyd edib.
Onun sözlərinə görə, bu gün başlıca problem Azalkalaki-Tbilisini birləşdirən ərazinin reabilitasiyasından ibarətdir. Layihənin texniki -iqtisadi əsaslandırmasının azərbaycanlı ekspertlərin iştirakı ilə hazırlamaq planlaşdırılır. "Sonra biz layihənin ekspertizasını keçirmək niyyətindəyik, sonra isə ərazinin reabilitasiyasının dəyəri qiymətləndiriləcək. Gürcü tərəfinin qiymətləndirmələrinə görə, o, 202 mln. ABŞ dolları dəyərində qiymətləndirilir", - deyə M.Pənahov qeyd edib.
O hesab edir ki, gələn ilin aprel ayına qədəri Axalkalaki-Tbilisi ərazisinin qiymətləndirilməsi başa çatacaq.
"Mən düşünürəm ki, tikinti tamamlandıqdan sonra bu layihəyə Qazaxıstan, Çin, Ukrayna və Rusiya da qoşulacaq. Və bu, yalnız şərq və qərbi deyil, həm də şimal və cənubu birləşdirən marşrutlardan biri olacaq", - deyə nazir müavini bildirib.
Trend in xəbər verdiyi kimi, Qazaxıstan ilkin mərhələdə bu dəmir yol marşrutu vasitəsilə 10 mln. tona qədər nəql etmə imkanı haqqında bildirib. Marşrut üzrə əsasən quru yüklərin - metal, kömür, kükürd, əlvan metalların və s. daşınması nəzərdə tutulub. Qismən neft və neft məhsulları da daşınacaq. Marketinq araşdırmaları göstərir ki, hazırda Qara dəniz limanları vasitəsilə yüklərin göndərilməsində, o cümlədən yüklərin dəfələrlə bir nəqliyyat növündən başqasına boşaldılması məsələsində problemlər mövcuddur və bu, nəqliyyatın qiymətinin artmasına səbəb olur. Dəmir yolu ilə birbaşa daşınmalar ucuzdur və daha böyük potensiala malikdir.
İlk üç il ərzində Bakı-Tbilisi-Axalkalaki-Qars marşrutu üzrə dəmir yolu nəqliyyatı ilə daşınmaların həcmi 3-5 mln. tona qədər, gələcəkdə isə 8 mln. tona qədər arta bilər.