2006-cı ildə dövlət büdcəsinə vergi daxilolmaları proqnozu 103,3% yerinə yetirilib və planlaşdırılmış 2,631 mlrd. manat əvəzinə Vergilər Nazirliyi 2,717 mlrd. manatın ödənilməsini təmin edib. Bu barədə Trend xəbər verir.
Dövlət başçısı İlham Əliyevin sədrliyi altında keçirilən Nazirlər Kabinetinin 2006-cı ilin sosial-iqtisadi yekunları və 2007-ci ildə qarşıya qoyulmuş vəzifələrə həsr olunmuş iclasında vergilər naziri Fazil Məmmədov bildirib ki, 2005-ci illə müqayisədə vergi daxilolmaları 1,289 mlrd. manat və ya 90,3% artıb.
Büdcə daxilolmalarında da həmçinin vergi ayrılmalarının xüsusi çəkisi artıb. Əgər bu göstərici 2005-ci ildə 69,5% təşkil edibsə, o zaman 2006-cı ildə 70,8%-ə qədər artıb.
Vergi yığımlarının ÜDM-də xüsusi çəkisi 3 bənd artaraq, 15%-ə çatdırılıb.
Ötən il neft sektorundan dövlət büdcəsinə daxilolmalar 1,674 mlrd. manat təşkil edib və proqnoz 108% yerinə yetirilib. Belə artım 2006-cı ildə "Azəri-Çıraq-Günəşli" yatağının dərin sulu hissəsinin birgə istismarı və hasilatın paylaşdırılması haqqında Saziş üzrə podratçı şirkətlər tərəfindən mənfəət vergisinin dövlət büdcəsinə ödənilməyə başlanması ilə də izah olunur. 2006-cı ildə onların xətti üzrə dövlət büdcəsinə 972,9 mln. manat keçirilib.
Dövlət sektorunun xətti ilə vergi ayrılmaları 25,9%, qeyri-dövlət sektor üzrə isə - 146% artıb.
