Dövlətin iqtisadi funksiyalarının daha effektiv, qənaətli və nəticə etibarilə səmərəli həyata keçirilməsi üçün Azərbaycanın Hesablama Palatası Büdcə məcəlləsinin hazırlanmasını məqsədəuyğun hesab edir. Trend Hesablama palatası aparatının rəhbəri Rasim Həsənova istinadən xəbər verir ki, o, maliyyə təminatının bütün aspektlərini əhatə etməlidir.
Onun sözlərinə görə, Büdcə məcəlləsinə ölkənin sosial-iqtisadi inkişafının proqnozlaşdırılması, büdcə və büdcədən kənar dövlət təşkilatlarının maliyyə-təsərrüfat fəaliyyətinin səmərəliliyi və effektivliyinin qiymətləndirilməsi üzrə hüquqi və iqtisadi normalar daxil olmalıdır. Bundan başqa, burada dövlət gəlirlərinin potensialının qiymətləndirilməsi üzrə normalar, onların sosial-iqtisadi inkişafa təsirinin idarə olunmasının mexanizm və vasitələri, dövlət xərclərinin effektivliyinin təmin olunması üzrə mexanizmlər, dövlət xərclərinin və bütövlükdə büdcənin proqramlaşdırma səviyyəsinin artırılması, dövlət büdcəsinin formalaşması, icrası və hesabatı üzrə normalar və s. müəyyən olunmalıdır.
Dövlət büdcəsi ilə yanaşı "möhkəmləndirilmiş büdcə" və "büdcə sistemi" kimi maliyyə institutlarının həcmi və strukturu da artması səbəbindən də məcəlləyə ehtiyac duyulur.
Maliyyə naziri Samir Şərifov həmçinin hesab edir ki, "Büdcə sistemi haqqında" qanun təkmilləşdirilməlidir. Onun fikrincə, artıq büdcə məsələlərini nizamlayacaq Büdcə məcəlləsi layihəsinin işlənib hazırlanmasının vaxtı çatıb. Maliyyə Nazirliyi büdcə prosesinin yaxşılaşdırılmasında maraqlıdır və proqnozlaşdırılmanın orta müddətli sistemini hazırlayır. Bu sistem çərçivəsində büdcə xərcləri üzrə ən azı üç illik proqnozlar hazırlanacaq.
İqtisadi siyasət üzrə parlament komissiyasının sədri Ziyad Səmədzadə həmçinin ölkənin sosial-iqtisadi vəziyyətini daha yaxşı qiymətləndirməyə və şəffaflığı təmin etməyə imkan verəcək Büdcə məcəlləsinin yaradılması ideyasını dəstəkləyib.