Azərbaycan, Bakı/ Trend / Bank Respublika yeniyetmələr üçün yeni plastik kart buraxacaq. Bu plastik kart Azərbaycanda 8 yaşından 18 yaşına qədər olan şəxslər üçün nəzərdə tutulub. Bu barədə bankın məlumatında göstərilib.
Yeniyetmələr üçün kart buraxılışında məhdudiyyətlərin olması səbəbindən, bəzən valideynlər öz adına kartı rəsmiləşdirərək istifadə üçün uşaqlarına verirlər. Bu narahatçılığı aradan qaldırmaq üçün İlk Kart 8-dən 18-dək yaşda olan şəxslərin öz adlarına buraxılacaq.
Beləliklə, İlk Kart böyüyən nəslin həyatında ilk plastik kart olacaq və bu amil kartın adında da öz əksini tapır.
İlk Kart VISA Electron kartının bazasında buraxılacaq və bankomatdan nağd pulun çıxarılması, mal və xidmətlərin ticarət-xidmət müəssisələrində nağdsız ödənişi, həmçinin İnternet vasitəsilə elektron ödənişlər üçün istifadə oluna bilər. Kartların istifadə coğrafiyası dünyanın 200-ə qədər ölkəsini əhatə edəcək. Bu kartlar da pulsuz və xidmət haqqı olmadan veriləcək.
İlk Kart valideynin və ya həddi-buluğa çatmış başqa bir şəxsin kartına əlavə kart kimi buraxılacaq. Valideyn övladının xərclərini nəzarətdə saxlamaq və artıq xərclərin qarşısını almaq məqsədi ilə kartla əməliyyatların məbləğinə gündəlik, həftəlik və ya aylıq limit təyin edə bilər. Bu kartlar uşağın başqa şəhərdə və ölkədə yaşadığı, yaxud oxuduğu halda daha da rahatdır. Bu zaman pulun göndərilməsi məsələsi asanlıqla həll olunur, belə ki, valideynin kart hesabına pul yerləşdirməsi kifayət edir.
İlk Kart istifadəçiləri Bank Respublika tərəfindən plastik kart müştəriləri arasında keçirilən bütün uduş kampaniyalarında və həmçinin bu kartlar üzrə xüsusi uduş kampaniyalarında iştirak edəcəklər.
Bank Respublika hazırda bu kartları 8-dən 18-dək yaşda olan şəxslərə verir, lakin bu yaş kateqoriyasının kartlarını fərqləndirmək üçün iki müxtəlif dizayn variantı ilə İlk Kart buraxılması qərara alınıb.