Azərbaycan, Bakı, 19 may/ Trend , müxbir A.Bədəlova/ Cənubi Koreya Azərbaycanda neft və qaz yataqlarının mənimsənilməsi üzər layihələrdə iştirak etməyi arzulayır. Bu barədə bazar ertəsi Azərbaycan-Koreya biznes-forumunda Koreya Energetika Universitetinin icraçı direktoru Ryu Ji Çul məlumat verib.
Koreya Azərbaycandan neft idxalına 2007-ci ildə başlayıb. Koreyanın ümumi neft idxalı həcminin 0,75 faizi Azərbaycanın payına düşür. Ötən il iki ölkə arasında mal dövriyyəsi 14 dəfə artaraq, 2007-ci ildə $446 mln. təşkil edib. 2006-cı ildə bu rəqəm $47 mln. olub.
"Koreyanın "İnam" yatağının işlənilməsində Azərbaycanla əməkdaşlığa dair təcrübəsi var və biz bu əməkdaşlığın genişlənəcəyinə ümid edirk", - Ryu Ji Çul bildirib. Koreynaın KNOC şirkəti bir müddət əvvəl "İnam" perspektivli dəniz strukturunun işlənilməsi üzrə layihədə 20 faiz iştirak alıb.
Korea Investment and securities Co şirkətinin vitse-prezidenti Can Xye-Kuk çıxışında bildirib ki, dəniz limanlarının, elektrik stansiyalarının, elektrik enerjisi şəbəkələrinin yaradılması üzrə layihələr Koreya üçün daha perspektivli layihələrdir.
"Azərbaycan bazarı böyük üstünlüklərə, o cümlədən də dünyanın diqqətini cəlb edən çox- saylı enerji ehtiyatlarına malikdir. Enerji ehtiyatlarının işlənməsi, gəmiqayırma, dəniz limanlarının yaradılması, daşınmaz əmlak bazarı sərmayələrin cəlb edilməsi üçün çox böyük potensiala malikdir və biz bu sahələrdə əməkdaşlıq etməyə hazırıq",- San Xye-Kuk bildirib.
Biznes-forumun gedişində Azərbaycan və Korya arasında dörd əməkdaşlıq memorandumu imzalanıb; enerji ehtiyatlarının birgə öyrənilməsi, gəmiqayırma zavodunun birgə istehsalı, gigiyena məhsullarının birgə istehsalı haqqında memorandumlar və sərmayə və qiymətli kağızlar üzrə memorandum.