Azərbaycan, Bakı, 17 dekabr/ Trend / Oktyabr-noyabrda Bakı - Tbilisi - Ceyhan (BTC) boru kəməri ilə 136,7 min ton Qazaxıstan nefti nəql edilib, - Azərbaycanın Dövlət Statistika Komitəsindən xəbər veriblər.
Oktyabrda Amerikanın ChevronTexaco şirkəti Qazaxıstanın Tengiz yatağından hasil etdiyi nefti Bakı - Tbilisi - Ceyhan (BTC) boru kəməri ilə nəql etməyə başlayıb. Sazişin bəndlərinə əsasən, tengiz nefti BTC ilə və dəmir yolu ilə Gürcüstan limanlarınadək (Kulevi və Batumi) nəql ediləcək. Nəql edilən neftin həcminin 4 mln. tonadək artacağı gözlənilir.
ChevronTexaco Qazaxıstanın "Tengiz" yatağının operatorudur. Müqavilə sahəsinin işlənilməsi ilə "TengizŞevroyl" şirkəti məşğul olur.
BTC boru kəmərinin ümumi uzunluğu 1768 kilometrdir. Bunun 443 kilometri Azərbaycan. 249 km Gürcüstan, 1076 km Türkiyə ərazisindən keçir. BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz ); Statoil (8,71 faiz ); ТРАО (6,53 faiz ); Eni (5 faiz ); Total (5 faiz ); Itochu (3,40 faiz ); Inpex (2,50 faiz ); ConocoPhillips (2,50 faiz ) və Amerada Hess (2,36 faiz ).
Gürcüstanın Kulevidəki Qara dəniz terminalının sahibi SOCAR, Batumidəki terminalın sahibi isə "KazMunayqaz"dır.
