Azərbaycan, Bakı, 20 may / Trend , müxbir E.İsmayılov /
SOCAR (Azərbaycan Respublikası Dövlət Neft Şirkəti) Xəzər dənizinin Azərbaycan hissəsində eyniadlı perspektiv dəniz qaz-kondensat strukturunda ikibloklu yeni "Ümid-1" platformasının inşasını iyunun sonlarında başa çatdırmağı planlaşdırır, çərşənbə günü SOCAR-da görülən işlərdə yaxından iştirak edən mənbə məlumat verib.
"Tikinti üzrə işlər fasiləsiz olaraq aparılır. İşərin iyunun sonlarınadək başa çatdırılması planlaşdırılır", - mənbədən verilən məlumatda bildirilib.
Onun sözlərinə görə, platformada vertolyot meydançasının inşası həyata keçirilib. İlk öncə yaşayış yerləri inşa edilib.
Bu strukturda kəşfiyyat qazıntılarının aparılmasında əsas məqsəd ölkədə neft hasilatını artırmaqdır.
Daha öncə SOCAR-da başqa bir mənbənin verdiyi məlumata görə, "Ümid" strukturunun birinci kəşfiyyat buruğunda qazıntı işlərinin başlanması iyul ayına planlaşdırılır. Bu ilin sonuna qədər planlaşdırılmış qazıntı işlərinin yarısı həyata keçiriləcək. Bu strukturda birinci buruğun dərinliyi 6,5 min metr təşkil edir. 2009-cu ildə isə yalnız dörd min metr dərinlik qazılacaq.
Tikintisi tam həyata keçirilməmiş "Çıraq-6" platformasının əsasında inşa edilən "Ümid-1" platforması proqram çərçivəsində ən böyük obyekt hesab olunur - onun hündürlüyü 72 metr təşkil edir. Platforma "Bulla-dəniz" dəniz yatağından 15 kilometr məsafədə və dənizin 58 metr dərinliyində yerləşdiriləcək. Platformadan altı qaz yatağının qazılması gözlənilir.
"Ümid" perspektiv qaz strukturunda çıxarılması ehtimal olunan qaz ehtiyatları 300 milyard kubmetr, qaz-kondensatları ehtiyatları isə 30-40 milyon ton həcmində qiymətləndirilir.
Məqalə müəllifi ilə əlaqə ünvanı: [email protected]
