Azərbaycanda birinci rübdə dəyəri 3 milyard dollardan çox neft məhsulları ixrac olunub
Azərbaycan, Bakı, 17 iyun / Trend , müxbir N.İsmayılova /
2009-cu ilin birinci rübündə Azərbaycandan 3,2 milyard dollar həcmində neft məhsulu ixrac edilib ki, bu da ölkənin ümumi ixracının 88,4 faizi deməkdir. Bu barədə Azərbaycan Mərkəzi Bankının açıqladığı ödəmə balansında deyilir. Hesabatda neft məhsullarının dominant mövqeyinin saxlanılması qeyd olunub. 2008-ci ilin analoji dövrü ilə müqayisədə neft məhsullarının ixracı iki dəfədən çox azalıb.
Bu ixracdan neft emalı məhsullarının payına 245,6 milyon dollar düşür. Ölkədən 2,9 milyard dollarlıq xam neft çıxarılıb. Onun 2,7 milyard dolları ABƏŞ-in əldə etdiyi xam neftin payına düşür. Onlardan 2,02 milyard dolları Azərbaycanın payına düşən gəlir nefti, bir hissəsi isə (636,1 milyon dollar) bir sıra böyük neft şirkətlərinin ölkədəki neft-qaz layihələrinə qoyduqları birbaşa sərmayələr hesabına repatriasiya edilib. Azərbaycan Respublikası Dövlət Neft Şirkəti və ölkənin digər müəssisləri 128,1 milyon dollarlıq neft ixrac edib.
Qeyri-neft sektorunun payına düşən ixrac məhsullarının ümumi dəyəri 34 faiz azalaraq 170,9 milyon dollar olub.
