Azərbaycan, Bakı, 27 avqust / Trend /
İlin sonunadək Azərbaycan dəmir yolları ilə yük daşınmasının həcmi artırılacaq. Bu barədə cümə axşamı "Azərbaycan Dəmir Yolları" QSC idarəsindən məlumat verilib.
Artım Səngəçaldakı terminaldan nəql edilən neftin həcminin artırılması hesabına nəzərdə tutulur. Buradan Qazaxıstanın "Tengiz" yatağının, eləcə də Bakı-Tbilisi-Ceyhan (BTC) layihəsinin iştirakçıları olmayan, "Azəri Çıraq-Günəşli" yatağının işlənməsi layihəsinin iştirakçılarının (Exxon Mobil və Devon) nefti daşınır.
"Azərbaycan Dəmir Yolları" QSC-dən deyildiyi kimi, yeddi ay ərzində bu terminaldan 21,8 min sistern neftlə yüklənib. Bu da proqnozun təxminən 109 faizini təşkil edir.
Statistika Komitəsinin məlumatına görə, 2009-cu ilin yeddi ayı ərzində dəmir yol nəqliyyatı ilə 11,6 milyon ton müxtəlif yüklər daşınıb. Ötən ilin yanvar-iyul aylarında bu göstərici 16,4 milyon ton olub.
"ADY"dən deyildiyi kimi, ilin sonunadək "Tengiz" yatağından neft nəqlinin artırılması gözlənilir. Ötən ilin oktyabrında Amerikanın ChevronTexaco şirkəti "Tengiz" neftinin BTC ilə nəqlinə başlayıb. Müqavilənin şərtlərinə əsasən, "Tengiz" nefti BTC və dəmir yolu ilə Gürcüstan limanlarına qədər (Batumi və Kulevi) daşınacaq. Daşınan neftin həcminin ildə dörd milyon tonadək artırılması gözlənilir.
ChevronTexaco Qazaxıstanın "Tengiz" yatağının operatorudur. Müqavilə ərazisinin işlənməsi ilə "TengizŞevroyl" əməliyyat şirkəti məşğul olur.
Gürücstanın Qara dəniz terminallarından Kuleviyə Azərbaycan Dövlət Neft Şirkəti, Batumiyə isə "QazMunayQaz" şirkəti sahiblik edir.
Məqalə müəllifi ilə əlaqə ünvanı: [email protected]
