Azərbaycan, Bakı, 19 oktyabr / Trend , müxbir E.İsmayılov/
Okyabrın sonuna kimi ARDNŞ-in Kulevi (Gürcüstan) neft terminalı Ukraynanın ötən il Qara dənizdəki terminalda batan "Skadovsk" gəmisinin kəsilməsi üzrə birinci mərhələsini başa çatdırmağı planlaşdırır, bu barədə terminalın rəsmi saytda yerləşdirdiyi məlumatında deyilir.
Məlumatda deyildiyi kimi, hazırda kran gəmisinin komandası və dalğıclar arasında iş planının hazırlanması başa çatır. Plan hazır olduqdan sonra kran işlərin həyata keçirildiyi yerə gətiriləcək. "Biz ümid edirik ki, əməliyyat yaxın günlərdə başlayacaq", - məlumatda deyilir.
Kulevi neft terminalı gəminin sahibləri işlərin keçirilməsindən imtina etdikdən sonra gəminin özbaşına qaldırılması üzrə işlərə başlayıb.
"Qara dəniz texniki donanma" şirkətinin "Skadovsk" gəmisi limana böyük tonajlı gəmilərin daxil olması üçün limanda dənizin dibinin dərinləşdirilməsi üzrə işlər həyata keçirib. Qəza neft terminalının fəaliyyətinə heç cür təsir etməyib. Limana gəmilərin daxil olması üçün heç bir maneə yoxdur.
Ötən il sentyabr 30-da fırtına (6-7ballıq fırtına) nəticəsində "Skadovsk" saya oturub və gəmidə dəlik əmələ gəlib. Sonra Ukraynadan mütəxəssislər gələrək, yedəkləmə yolu ilə gəmini dayaz yerdən çıxarmağa qərar veriblər. Yedəkləmə işlərinin aparılması nəticəsində gəmi çevrilib. Bu barədə mənbədən daha öncə bildirilib.
Qəza zamanı gəminin kapitanı və iki ekipaj üzvü həlak olub. Ölənlərin cəsədlərinin axtarışı bir neçə gün davam edib. Gəminin göyərtəsində olan 31 nəfərdən 28-i xilas edilib.
Məqalə müəllifi ilə əlaqə ünvanı: [email protected]
