Azərbaycan, Bakı, 22 dekabr / Trend , müxbir A.Bədəlova, E.İsmayılova/
2010-cu ilin birinci rübündə ARDNŞ (Azərbaycan Respublikası Dövlət Neft Şirkəti) Xəzər dənizinin Azərbaycan sektorundakı Günəşli dəniz yatağının "Günəşli-4" platformasında qaz kompressor stansiyasının tikintisi çərçivəsindəki əsas işləri başa çatdırmağı planlaşdırır. Bu barədə çərşənbə axşamı ARDNŞ-in ekologiya məsələləri üzrə vitse prezidenti Muxtar Babayev deyib.
"Mən fikirləşirəm ki, 2010-cu ilin birinci rübündə əsas işlər başa çatacaq və avadanlıqların sazlanılmasına başlanılacaq", - Babayev deyib.
"Azneft" İstehsalat Birliyinin baş direktorunun ekoloji məsələlər üzrə müavini Faiq Cəfərovun əvvəl dediyi kimi, kompressor stansiyası növbəti ilin yazında istismara veriləcək.
"Günəşli-4" platformasında yeni kompressor stansiyasının qurulması nəticəsində atmosferə aşağıtəzyiqli qazın buraxılması 90 faiz azalacaq, Babayev əvvəl deyib.
ARDNŞ "Günəşli" yatağının dayaz hissəsindəki aşağıtəzyiqli səmt qazını toplamaq niyyətindədir. Bu qaz sıxıldıqdan sonra Azərbaycanın qaz emalı zavoduna və ya milli qaz nəqliyyatı sisteminə göndərilərək abunəçilərə veriləcək. Həmin qazın nəql edilməsi üçün artıq quruda boru kəməri çəkilib.
Əvvəllər bu qaz infrastrukturun çatışmaması səbəbindən atmosferə atılıb və bu da ətraf mühitə böyük zərər verib. Lazımi infrastrukturun qurulması və layihənin reallaşmasının dəyəri 150 milyon dollar dəyərində qiymətləndirilir.
Atılan qazın həcmi ildə 150-250 milyon kubmetr arasında dəyişir.
Məqalə müəllifi ilə əlaqə ünvanı: [email protected]
