Azərbaycan, Bakı, 23 fevral / Trend /
ARDNŞ-nin (Azərbaycan Respublikası Dövlət Neft Şirkəti) Ekologiya İdarəsi quyuların kəşfiyyatı və işlənməsinin ətraf mühitə təsirinin öyrənilməsi, qiymətləndirilməsi istiqamətində dənizdə 20, quruda isə 128 ekoloji monitorinq aparıb. Bu barədə İdarənin çərşənbə axşamı yayılan məlumatında deyilir.
Monitorinqlər zamanı Xəzər dənizinin ekoloji sisteminə təsir parametrlərinin müəyyənləşdirilməsi məqsədi ilə su mühitinin ümumi fiziki-kimyəvi parametrləri, neft, neft məhsullarının, fenolların və metalların miqdarı, dib çöküntülərinin fiziki-kimyəvi təhlilləri araşdırılır.
Quruda neft-qaz yataqlarında monitorinq tədqiqatları əsasən mədən ərazilərində neft və neft məhsulları ilə və istehsal prosesi zamanı formalaşan tullantılarla çirklənmiş torpaqların hərtərəfli öyrənilməsinə, çirklənmə mənbələrinin müəyyənləşdirilməsinə və çirklənmənin aradan qaldırılması üzrə təkliflərin hazırlanmasına yönəldilib.
