Azərbaycan, Bakı, 3 avqust /Trend/
ARDNŞ-nin (Azərbaycan Respublikası Dövlət Neft Şirkəti) Gürcüstanın Kulevi şəhərində yerləşən Qara dəniz terminalı yanvar-iyul aylarında 2 milyon tona yaxın neft və neft məhsulları qəbul edib. Bu barədə çərşənbə axşamı ARDNŞ-nin məlumatında deyilir.
İyul ayı ərzində neft terminalı 409778 ton neft və neft məhsulları qəbul edib, 407982 ton neft və neft məhsulu isə dünya bazarlarına göndərib.
Terminalda bu ilin yeddi ayı ərzində neft və neft məhsullarının qəbulu ötən ilin müvafiq dövrünə nisbətdə 65 faiz artıb. Ümumi yükdaşımanın miqdarı isə 55 faiz artıb.
Cari ilin mayından məhsulların, xüsusilə də xam neftin kəskin artımı müşahidə olunur. Bu, maydan etibarən terminalda "Tengiz" yatağından Qazaxıstan neftinin qəbuluna başlanması ilə əlaqədardır.
Bundan əvvəl Gürcüstan hökumətinin məlumatında göstərildiyi kimi, 2009-cu ildə Kulevi neft terminalı 2008-ci ildəki 1,3 milyon tonla müqayisədə 2,1 milyon ton neft qəbul edib. Ötən il terminalda 99 gəmi yüklənilib. 2008-ci ildə bu rəqəm 65 gəmi olub.
Kulevi terminalı istismara 2008-ci ilin mayında verilib. Neft məhsullarının faktiki olaraq boşaldılmasına iyundan başlanılıb. Terminalda neft və neft məhsullarının yüklənməsinin ümumi gücü ildə 10 milyon ton neft yüküdür. Bura üç milyon ton neft, üç milyon ton dizel yanacağı, dörd milyon ton mazut daxildir. Rezervuar parkının ümumi tutumu 320 min kubmetr təşkil edir və 380 min kubmetrədək artırılması mümkündür.
Neft əməliyyatları üçün terminalda neft məhsullarının 100 min tonadək yükgötürmə qabiliyyətinə malik tankerə doldurulması üçün iki yanalma körpüsü nəzərdə tutulub. Məhsuldarlıq saatda 1000-dən 8000 kubmetrədək neft doldurulması təşkil edir. Müəssisədə liman dəmiryol stansiyası da var ki, burada eyni vaxtda yükün boşaldılmasını gözləyən 180 vaqon-sistern yerləşdirmək mümkündür. Dəmiryol estakadalarında eyni vaxtda 168 vaqon-sisternin boşaldılması mümkündür.
