Azərbaycan, Bakı, 20 yanvar /Trend, müxbir A.Axundov/
Azərbaycan qazının Suriyaya ixrac ediləcəyi Hələb və (Suriya) və Kilis (Türkiyə) şəhərləri arasında qaz kəmərinin Türkiyədən keçən hissəsinin tikintisi 2012-ci ildə başa çatacaq. Bu barədə Trend-ə çərşənbə günü Türkiyə Energetika Nazirliyindən bildiriblər.
"BOTAŞ 2010-cu il dekabrın 29-da qaz kəmərinin Kilis şəhərindən Suriya sərhədinədək olan hissəsinin tikintisi üzrə tender elan edib. Təkliflər 2011-ci il yanvarın 28-dək qəbul edilir. İşlərin müqavilə imzalanandan və ərazi təhvil verildikdən 360 gün sonra başa çatdırılması planlaşdırılır", - Energetika Nazirliyindən qeyd ediblər.
Məlumata əsasən, layihənin dəyəri ərazinin tikintisi üzrə müqavilə bağlandıqdan sonra müəyyən ediləcək.
"Hələb şəhərindən Türkiyə sərhədinədək olan ərazinin tikintisini Suriya tərəfi həyata keçirir", - nazirlikdən bildiriblər.
Suriya Prezidenti Bəşşar əl-Əsədin 2009-cu ilin iyulunda Azərbaycana səfəri zamanı tərəflər bir milyard kubmetr qaz tədarükünə dair razılığa gəliblər.
Bundan əvvəl Trend-ə Suriya neft nazirinin müavini Həsən Zeynəbin dediyi kimi, Suriya 2011-ci ildə Azərbaycandan qaz idxalına başlaya bilər.
"Lakin dəqiq tarix hələ müəyyən olunmayıb. Mövcud məsələ üzrə heç bir problem yoxdur, biz yalnız Türkiyə və Suriya arasında qaz kəmərinin qalan hissəsinin tikintisinin başa çatmasını gözləyirik. Bizdə məlumat var ki, işlər yaxın günlərdə başa çatacaq", - Zeynəb bildirib.
Onun sözlərinə görə, idxal olunan qazın həcmi sutkada 2-3 milyon kubmetr təşkil edəcək.
Hələb və Kilis arasında qaz kəmərinin uzunluğu 63 kilometr təşkil edəcək.
ABŞ Dövlət Enerji İnformasiya İdarəsinin (EIA) məlumatına əsasən, Suriyanın sübut olunmuş qaz ehtiyatları 2009-cu ildə doqquz trilyon kubfut təşkil edib.
2004-2008-ci illərdə Suriyada qaz hasilatı azalıb, lakin yeni layihələr hazırlandığından hasilatın tezliklə genişlənməsi gözlənilir.
2009-cu ildə Suriyada qaz hasilatı 219 milyard kubfut, tələbat isə 251 milyard kubfut olub.
2008-ci ildə ölkədə qaz hasilatı 208 milyard kubfut, idxal beş milyard, tələbat isə 213 milyard kubfut təşkil edib.