Azərbaycan, Bakı, 5 mart /Trend, müxbir T.Cəfərov/
Fars körfəzi ölkələri və Afrikanın şimalındakı ölkələrdə baş verən hadisələr İranın neft gəlirlərinin 1,5 milyard dollar artmasına səbəb olub. İranın Neft Nazirliyinin statistikasına əsasən, ilin sonunadək (İranda il martın 21-də dəyişir) ölkənin neft gəlirlərinin həcmi 80 milyard dollara çatacaq. Bu barədə Trend İranın MEHR xəbər agentliyinə istinadən məlumat verir.
Məlumatda bildirilir ki, Neft Nazirliyinin statistikasına görə, Mahmud Əhmədinejadın prezidentliyinin ikinci dövrünün ilk ilində (2009-cu il) İranın neft gəlirlərinin həcmi 69 milyard dollar təşkil edib.
İran sutkada 2,2 milyon barel xam neft ixrac edir. İran KİV-in məlumatına əsasən, son vaxtlar bu ölkənin neftinin qiyməti 110 dollara qədər artıb.
BP-nin məlumatına görə, İranın 1 yanvar 2009-cu ilə təsdiqlənmiş neft ehtiyatları 137,6 milyard barel təşkil edir ki, bu da 2008-ci ilin əvvəlindəki rəqəmdən 600 milyon barel azdır. Şirkətin icmalında deyilir ki, İranın 1 yanvar 2009-cu ilə təsdiqlənmiş neft ehtiyatları ümumdünya neft ehtiyatlarının 10,9 faizini təşkil edir.
İranın neft naziri Məsud Mirkazimi isə 2010-cu ilin oktyabr ayında jurnalistlərə verdiyi açıqlamada İranın 150 milyard barrel neftə malik olduğunu deyib.