Azərbaycan, Bakı, 30 noyabr/Trend, müxbir E. İsmayılov/
Azərbaycanda qazlaşdırmanın səviyyəsinin və qaz təchizatının keyfiyyətinin artırılmasına dair proqramın həyata keçirilməsi üzrə işlər qrafikə uyğun olaraq aktiv templə aparılır. Bu barədə cümə günü Trend-ə "Azəriqaz" İstehsalat Birliyindən (İB) məlumat verilib.
Məlumata görə, qazlaşdırma işləri bütün ölkədə aparılır. Xüsusən bu gün və sabah Füzuli və Ağdam rayonlarının bəzi yaşayış məntəqələrinə qazın verilişinə başlanılacaq.
"Qazlaşdırma işləri hər yerdə gücləndirilmiş templə aparılır" , - "Azəriqaz"dan qeyd edilib.
Bildirilib ki, "Azəriqaz"ın apardığı işlərin yekununda ölkədə qazlaşdırmanın səviyyəsi 95 faizə çatdırılacaq.
"Artıq 2013-cü ilin nəticələri üzrə bu göstəriciyə çatılacaq", - İB-dən vurğulanıb.
Qeyd edək ki, noyabrın 1-nə Azərbaycanda qaz abonentlərin sayı 1 444 156 nəfər təşkil edir.
