Azərbaycan, Bakı, 11 sentyabr /Trend, müxbir Emil İsmayılov/
Azərbaycan Respublikası Dövlət Neft Şirkəti (ARDNŞ) "0 tullantı" proqramı çərçivəsində atmosferə atılan səmt qazı tullantılarının minimuma endirilməsi üzrə fəal iş aparır. Bunu Trend-ə ARDNŞ-nin Ekologiya İdarəsinin baş mühəndisi Yaqub Ağasıyev deyib.
Onun sözlərinə görə, yataqlarda, o cümlədən dəniz yataqlarında atmosferə buraxılan aşağı təzyiqli səmt qazı tullantılarının həcminin azaldılması üçün zəruri kompressor gücləri yaradılıb. Yeni güclər səmt qazının tutulmasını və onun quruya, sonra isə ölkənin ümumi qazpaylayıcı şəbəkəsinə ötürülməsini təmin edir.
Y.Ağasıyev "Neft Daşları" yatağında və "Günəşli" yatağının dayaz hissəsində kompressor güclərinin tikintisi sahəsində aparılan işləri vurğulayıb: "Səmt qazlarının yığılması məsələsi kifayət qədər öz həllini tapıb. Bu göstəricini sıfıra endirmək, demək olar, mümkün deyil. Bu məqsədlə fəal işlər aparılır".
Onun sözlərinə əsasən, ölkədə səmt qazı tullantılarının həcmi 1-1,5 faiz səviyyəsindədir və bu emissiya kiçik həcmdədir: "Həmin həcm əsasən quru yataqların payına düşür. Tullantıların kiçik həcmləri onların tutulması prosesini çətinləşdirir. Bundan başqa, tutma prosesinin özü olduqca bahalıdır".
