"Azəri" yatağının mərkəzi hissəsində qazın tam sıxılması və suyun vurulması üçün platformanın (QSSVP) buraxılması vaxtı bu ilin ikinci rübünə keçirilir. Bu barədə Trend ə "Azəri-Çıraq-Günəşli" yatağının işlənib hazırlanması layihəsinin operatoru VR Azerbaijan şirkətində bildirilib. Bundan öncə, qazın vurulmasına bu ilin əvvəlində başlanılması nəzərdə tutulurdu.
Şirkətdə qeyd olunub ki, hazırda platformada işəsalma və montaj işləri davam etdirilir və bunun nəticəsində platformanın buraxılma müddəti bir qədər dəyişəcək. Platformanın inşası Amec-Tekfen-Azfen (ATA) şirkət alyansı tərəfindən həyata keçirilib və ötən ilin iyulun əvvəlində quraşdırma yerinə göndərilib.
QSSVP-nin tammiqyaslı istismara verilməsinə başlandıqdan sonra bu platformadan mərkəzi, qərbi və şərqi "Azəri"nin platformaları üçün suyun və qazın vurulması həyata keçiriləcək. QSSVP-də bu platformalarla birləşdirildikdən sonra səmt qazının ixracı və elektrik enerjisi istehsalının təmin edilməsi mümkün olacaq.
