"Mən hesab edirəm ki, hazırda benzinin daxili qiymətinin artmasına ehtiyac yoxdur. Dizel yanacağının qiymətinin artması öz müsbət nəticələrini verib", - deyə Azərbaycanın sənaye və energetika naziri Natiq Əliyev Trend ə xəbər verib.
Onun sözlərinə görə, dizel yanacağının qiymətinin artması ilə müxətlif keyfiyyətli məhsulların qarışdırılması, qiymətin aşağı olması səbəbindən qaçaqmalçılıq kimi neqativ amillərə və qeyri-qanuni ixrac amillərinə son qoyulub.
Bundan başqa, respublikada dizel yanacağına olan tələbat aşağı düşüb, bu isə ARDNŞ-ə onu daha çox ixrac etmək və daha çox vəsait əldə etmək imkanı verib.
Nazirin fikrincə, bu il benzinin qiymətinin qaldırılması nəzərdə tutulmayıb. "Bu, onun dünya bazarlarındakı qiymətindən asılı olacaq. Dünyada qiymət qalxan zaman Azərbaycanda qiymət aşağı olanda bu, problemlərin yaranmasına səbəb olur. Bir tərəfdən dövlət öz bazarını tənzimləyir, digər tərəfdən isə qaçaqmalçılıq təhlükəsi mövcuddur", - deyə N.Əliyev qeyd edib.