Rusiya tərəfi Azərbaycana xəbərdarlıq göndərib ki, bu gün respublikaya qaz verilməsi dayandırılacaq. Bu barədə Trend ə "Azəriqaz" qapalı səhmdar cəmiyyətindən bildiriblər. Hazırda qaz hələ verilir, lakin günün ortalarına yaxın qaz verilməyəcək. Qazın avqustun 24-də bərpa olunacağı ehtimal olunur.
"Kaspiyqazprom" MMC Dağıstan ərazisindən keçən magistral qaz kəmərlərində kompleksi plan-profilaktik və təmir işlərinin ikinci mərhələsinə başlayır. Bu işlər "2006-cı ildə Qaz təchizatının vahid sisteminin obyektlərində kompleks plan-profilaktik və təmir işlərinin görülməsinin plan-qrafiki"nə əsasən görülür.
İşlər "Makat-Şimali Qafqaz", "Mozdok-Qazıməmməd" və "Kumli-Aksay" magistral qaz kəmərlərində görüləcək.
Yanvar-iyul aylarında Rusiyanın "Qazeksport" şirkəti ("Qazprom" ASC-nin törəmə qurumu) Azərbaycana 2 mlrd. 670,3 mln. kubmetr qaz tədarük edib. Cari ildə ARDNŞ "Qazeksport"dan 1 min kub metri 110 ABŞ dollarına təxminən 4,5 mlrd. kubmetr qaz almağı planlaşdırır.
