Rusiyanın LUKoil şirkəti "Yalama" strukturunda (D-222) aparılmış tədqiqatlar zamanı əldə olunmuş seysmik məlumatları ətraflı şəkildə öyrənir. Məlumatların öyrənilməsinin yekunları üzrə şirkət yeni kəfiyyat quyusunun qazma nöqtəsini müəyyən etmək niyyətindədir. Trend in xəbər verdiyi kimi, bu barədə ARDNŞ prezidenti Rövnəq Abdullayev məlumat verib.
Onun sözlərinə görə, şirkət üçün kəşfiyyat işlərinin müddəti uzadılıb. Daha əvvəl isə LUKoil Overseas Holding Ltd nümayəndələri ARDNŞ rəhbərliyinə D-222 blokunda ikinci perspektivli kəşfiyyat quyusunun qazılması ilə bağlı niyyətlərini bildirib.
LUKoil "Yalama" strukturunda birinci kəşfiyyat quyusunun qazılması zamanı iqtisadi cəhətdən cəlbedici karbohidrogen ehtiyatları aşkar etməyib. Quyular "Heydər Əliyev adına" qurğusundan 4500 metr dərinlikdə 332 metr qazma nöqtəsində qazılıb. Tullantısız sistemin tətbiq olunduğu qazma zamanı qazın əmələ gəlməsi əlamətləri qeydə alınıb.
Azərbaycanın perspektivli D-222 bloku üzrə kəşfiyyat, işlənmə və pay bölgüsü haqqında saziş 3 iyul 1997-ci ildə ARDNŞ və LUKoil arasında imzalanıb.
