Bakı. Trend:
COP29 çərçivəsində "USCAN: Oyun qaydalarının dəyişməsi: ABŞ-dəki seçkilərin nəticələri iqlim böhranında dönüş nöqtəsini necə göstərir" mövzusunda mətbuat konfransı keçirilib.
Trend xəbər verir ki, mətbuat konfransında “ActionAid USA”nın baş siyasi analitiki Kelli Stoun, İqlim və Enerji Siyasəti üzrə alimlər İttifaqının direktor müavini Reyçel Kletus, “Oxfam America”nın siyasət və proqramlar üzrə baş məsləhətçisi Eşli Tomas və “Çirikaua Apaçi”nin nümayəndəsi Şila Bearfut (Sheelah Bearfoot) çıxış ediblər.
Ekspertlər ABŞ prezident seçkilərinin mümkün nəticələri və onların iqlim siyasətinə təsiri barədə narahatlıqlarını ifadə etdilər. Onlar vurğulayıblar ki, Donald Trampın seçilməsi ölkədə qalıq yanacaq istehsalının artmasına səbəb ola bilər ki, bu da iqlim hədəflərinə çatmaq üçün edilən səyləri zəiflədir.
Bununla belə, qeyd olunub ki, hazırda Co Baydenin administrasiyası hakimiyyətdə qalır və COP29-da gözləntilər ABŞ-nin liderlik nümayiş etdirməsi, məsuliyyət götürməsi və danışıqlar zamanı ambisiyalı nəticələrin əldə edilməsinə kömək etməsidir.
Konfransda müzakirə edilən əsas mövzulardan birinin iqlim maliyyə yardımı olduğu vurğulanıb — xüsusən aşağı gəlirli ölkələr üçün təmiz enerjiyə keçidin sürətləndirilməsi, iqlim dəyişikliyinə uyğunlaşma və itki və zərərin ədalətli şəkildə idarə edilməsi üçün bu yardımların vacib olduğu qeyd olunub.
Qeyd edək ki, dünən BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasının açılışı olub. Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29 çərçivəsində ən yüksək səviyyəli tədbir – Dünya Liderlərinin İqlim Fəaliyyəti Sammiti noyabrın 12-13-də təşkil olunacaq.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.
